Улуттук банктын лицензиясы үчүн мамлекеттик алымдардын жаңы өлчөмү сунушталууда
КРнын Министрлер Кабинети мамлекеттик алымдардын ставкаларына өзгөртүү киргизүүнү сунуштады. Тиешелүү токтом долбоору Улуттук банк тарабынан берилүүчү лицензиялар үчүн мамлекеттик алымдардын өлчөмүн тактоону карап жатат. Аталган токтомдун долбоору коомдук талкууга сунушталууда.
Билдирүүгө караганда, долбоор Президенттин уруксат берүүчү документтер тармагындагы жөнгө салуучу гильотина тууралуу жарлыгын ишке ашыруунун алкагында даярдалган.
Сунушталган өзгөртүүлөргө ылайык, Улуттук банк тарабынан лицензия берүү, кайра тариздөө жана лицензиянын дубликатын берүү үчүн мамлекеттик алымдардын жаңы өлчөмдөрү белгиленет. Ага ылайык:
- банк операцияларын жүргүзүү укугуна лицензия алуу үчүн мамлекеттик алым 1000 эсептик көрсөткүчтү түзөт;
- төлөм системаларынын/операторлоруна лицензия берүү, электрондук акча чыгаруу укугу үчүн 700 эсептик көрсөткүч;
- банк эмес ФКУ жана Улуттук банк лицензиялаган башка юридикалык жактар үчүн лицензия берүүдө дагы 700 эсептик көрсөткүч;
- нак чет өлкө валютасы менен алмашуу операцияларын жүргүзүүгө лицензия алуу үчүн мамлекеттик алым 300 эсептик көрсөткүчтү түзөт.
Мындан тышкары лицензияларды кайра тариздөө жана алардын дубликаттарын берүү үчүн өзүнчө мамлекеттик алымдардын өлчөмү белгиленген.
Бул долбоорду коомдук талкуулоо 2026-жылдын 2-июлунда аяктайт. Ал эми токтом кабыл алынып, расмий жарыялангандан кийин 10 күндөн соң күчүнө кирет.
