Жогорку Кеңеш Улуттук банктын 2025-жылдагы иши жөнүндө отчетун жактырды
Жогорку Кеңештин жыйынында Кыргыз Республикасынын Улуттук банкынын төрагасы Алмаз Бакетаевдин 2025-жылдагы ишмердүүлүгү тууралуу отчёту угулду.
Өз сөзүндө төрага 2025-жыл ичинде Улуттук банкка жүктөлгөн функциялардын бардыгы толугу менен аткарылгандыгын, банк системасында санариптик инструменттер өнүккөндүгүн баса белгиледи.
“Санарип сом долбоору ийгиликтүү илгерилетилип, анын статусу ыйгарым мыйзамдуу төлөм каражаты катары бекитилди. Тышкы тобокелдиктердин таасири минималдаштырылды. Эң башкысы өлкөдө баалардын туруктуулугу камсыз кылынды. Тышкы тобокелдиктердин күчөшүнө карабастан, Улуттук банк жүргүзгөн тен салмактуу саясат өлкөдөгү инфляциялык процесстин ашыкча тездешине мүмкүндүк берген жок” – деди, Алмаз Бакетаев.
Талкуунун жүрүшүндө депутаттар инфляциянын деңгээли, насыялардын жеткиликтүүлүгү жана банк кызматтарынын сапаты боюнча маселелерди көтөрүштү.
Депутат Дастан Бекешев инфляцияны ооздуктоо боюнча Улуттук банк менен Министрлер Кабинетинин биргелешкен ишин күчөтүү зарылдыгын белгилеп, накталай эмес төлөмдөрдүн үлүшүн көбөйтүү жана банктардын санариптик туруктуулугун жогорулатуу сунушун айтты. Ал эми Депутат Медина Кайрылбекова керектөө насыяларын берүүдө алынган комиссияларга көңүл буруп, жарандар үчүн насыя алуу шарттарын жакшыртуу зарылдыгын белгиледи.
Мындан сырткары депутаттар Салтанат Аманова, Айсаракан Абдибаева жана Болотбек Борбиев кредиттер менен ипотекалык насыялар боюнча пайыздык чендерди кайра карап чыгып, каржылоону калк үчүн жеткиликтүүрөөк кылууга чакырышты.
Жыйындын соңунда депутаттар Улуттук банктын ишмердүүлүгүнө байланыштуу бир катар сунуштарын берип, Улуттук банктын 2025-жылдагы иши жөнүндөгү Улуттук банктын төрагасынын отчетун жактырышты.
