Бишкекте чакан кредиттик компаниянын иши токтотулду
Кыргыз Республикасынын Улуттук банкынын ченемдик укуктук актыларынын талаптарын бузууга жол бергендиги үчүн Бишкек шаарындагы микрокредиттик компаниялардын биринин иши токтотулду.
Улуттук банктын маалыматына ылайык, 2026-жылдын 18-июнунан тартып Бишкек шаарынын Токтогул көчөсүндө жайгашкан “Бай-Эл Кредит” МКК” ЖЧКнын 2009-жылдын 25-майында алган №212 эсептик каттоо тууралуу күбөлүгү кайтарылып алынды.
19-июнга карата Улуттук банктын тийиштүү күбөлүгүн алып Кыргызстандын аймагында ишмердүүлүк жүргүзүп жаткан 57 микрокредиттик компаниялар бар жана алардын басымдуу бөлүгү ордо калаабызда жайгашкан.
Микрокредиттик компания (МКК) – бул, Кыргыз Республикасынын Улуттук банкынын күбөлүгү болгон шартта өз каражаттарынын же донор уюмдардын жергиликтүү жана эл аралык финансы уюмдардын каражаттарынын эсебинен гана "Кыргыз Республикасындагы микрофинансылык уюмдар жөнүндө" мыйзам талабына ылайык жеке адамдарды жана юридикалык жактарды микрокредиттөөнү жүзөгө ашырган коммерциялык адистештирилген кредиттик мекеме микрофинансылык уюм болуп саналат.
