КРдагы банктар 4 айда 9,5 млрд сом таза киреше табышкан
КРнын Улуттук банкы өлкөнүн банк секторунун 2026-жылдын 30-апрелине карата өнүгүү тенденцияларын жарыялады. Ага ылайык, көрсөтүлгөн мезгилдин аралыгында 24 коммерциялык банк жана алардын 306 филиалы иштеп турган жана алардын тапкан таза кирешеси 9,5 млрд сомго жеткен.
Улуттук банктын билдирүүсүнө караганда, банк системасынын жалпы активдери төрт ай ичинде 28,6 % өсүп, 1 трлн 558,1 млрд сомго жетти. Ал эми кардарларга берилген кредиттердин көлөмү 12,4 % көбөйүп, 570 млрд сомго жакындады.
Кредит портфелиндеги классификацияланган кредиттердин үлүшү 11,2 % жетип, алардын жалпы көлөмү 64 млрд сомду түзгөн. Ошондой эле мөөнөтү өтүп кеткен кредиттердин көлөмү 20,2 % өсүп, 10,5 млрд сомго жеткен.
Депозиттик база да өсүүнү улантып, жыл башынан бери 6,7 пайызга көбөйүү менен 924,1 млрд сомду түздү. Бул калк менен бизнестин банк секторуна болгон ишениминин жогору бойдон сакталып жатканын көрсөтүүдө.
Ал эми депозиттердин долларлашуу деңгээли төмөндөп, 28,8 пайызды түздү. Бул көрсөткүч жыл башындагы деңгээлден 5,9 пайыздык пунктка аз. Ал эми кредиттердин долларлашуу деңгээли 18,3 пайыз деңгээлинде өзгөрүүсүз калды.
Банк секторунун таза капиталы дагы олуттуу өсүп, 279,2 млрд сомго жетти. Капиталдын жетиштүүлүгү коэффициенти 31,7 %, ал эми ликвиддүүлүк коэффициенти 91,8 % түзүп, Улуттук банктын талаптарынан кыйла жогору деңгээлде сакталууда.
