Улуттук банк Баткенде финансылык сабаттуулук боюнча лекция өткөрдү
Улуттук банктын Баткен областындагы өкүлчүлүгү Баткен шаарынын мэриясы менен биргеликте шаар тургундары үчүн финансылык сабаттуулукту жогорулатууга багытталган маалыматтык лекция уюштурду.
Иш-чаранын жүрүшүндө адистер жарандарга жеке каржыны туура башкаруу, акча каражаттарын сарамжалдуу пайдалануу жана өлкөдө QR-код аркылуу жүргүзүлүүчү заманбап төлөм кызматтары тууралуу кеңири маалымат беришти.
Мындан тышкары, финансылык алдамчылыктан жана дропперлик схемалардан сактануу боюнча кеңештер айтылып, катышуучуларга “Түндүк” тиркемеси аркылуу өзүнө кредит алууга тыюу салуу кызматын иштетүү жана зарыл учурда аны кайра алып салуу тартиби түшүндүрүлүп берилди.
Улуттук банктан билдиришкендей, июнь айынын ичинде ушундай эле агартуу иш-чаралары өлкөнүн башка аймактарында да өткөрүлүп, калктын финансылык сабаттуулугун жогорулатууга көңүл бурулган.
