Улуттук банк: кезектеги алдамчылык схемадан абайлаңыздар
Социалдык тармактарда жана мессенджерлерде жеңилдетилген насыя алууга жардам берүү тууралуу Улуттук банктын атын жамынган жарнамалык маалыматтар таратылууда.
Улуттук банктын басма сөз кызматынын билдирүүсүнө караганда, ишендириш үчүн алдамчылар Улуттук банктын логотиби бар жасалма документтерди жана жалган маалыматтарды мисал келтирүүдө.
Ушуга байланыштуу, Улуттук банк жарандарды сак болууга чакырып, мындай билдирүүлөргө ишенбей, маалыматты расмий булактардан тастыктамайынча, эч кандай шартта бейтааныш адамдарга акча которбоону сунуштайт.
Ошондой эле Улуттук банк - калкка насыя бербестигин, акча которууну суранбастынын, кызматкерлердин күбөлүгүн жиберип, байланышка чыкпастыгын жана жеке жактарга кызмат көрсөтпөстүгүн эскертет.
Ал эми кандайдыр бир себептерден улам, алдамчылардын курмандыгы болуп калган болсоңуз, дароо банктык төлөм карттарды бөгөттөп, укук коргоо органдарына кайрылуу керектелет.
