Кыргыз - казак улуттук төлөм системаларын интеграциялоо талкууланды
“Банктар аралык процессинг борбору” ЖАКтын (Элкарт) Башкармалыгынын төрагасы Алтымыш Туратбеков Казакстанда “Улуттук төлөм корпорациясы” акционердик коомунун жетекчилиги менен жолугушуп келди. Анда тараптар Кыргызстан менен Казакстандын улуттук төлөм системаларын интеграциялоо темасын талкуулашты.
Процессинг борборунун маалыматына ылайык, долбоор ишке ашырылгандан кийин “Элкарт” карталарынын ээлери Казакстандын соода жана тейлөө түйүндөрүндө банк картасы жана QR-код аркылуу төлөм жүргүзө алышат. Ошол эле учурда Казакстандын банктык тиркемелерин колдонгон жарандар да Кыргызстанда кадимки төлөм сервистери аркылуу ыңгайлуу эсептеше алышат.
Мындан сырткары тараптар заманбап төлөм технологияларын өнүктүрүү маселелерин талкуулап, ISO 20022 эл аралык стандартын киргизүү, банктар аралык мобилдик төлөмдөр системасын өнүктүрүү жана борбордук банктардын санариптик валюталарына байланышкан долбоорлор боюнча пикир алмашышты.
Учурда "Элкарт Мобайл" тиркемесинин колдонуучулары Казакстандагы сатып алуулар үчүн Kaspi QR төлөм тармагы аркылуу комиссиясыз төлөй алышат. Бул мүмкүнчүлүк “Элкарттын” эл аралык Alipay+ төлөм системасы менен интеграцияланышынын натыйжасында ишке ашууда.
