Улуттук банк эл аралык тегерек стол өткөрдү
Улуттук банк 8–11-сентябрь күндөрү Ысык-Көл облусунун Бостери айылындагы "Толкун" пансионатынын окуу-ден соолукту чыңдоо борборунда инженердик системаларды техникалык тейлөө боюнча эл аралык тегерек стол өткөнүн билдирди.
Иш-чара "Улуттук банктын имараттарынын жана курулмаларынын инженердик системаларын техникалык тейлөө" темасына арналды. Тегерек столду Улуттук банк уюштуруп, модераторлук кылды.
Ага Казакстан жана Тажикстан республикаларынын улуттук банктарынын, ошондой эле Армения Республикасынын борбордук банкынын өкүлдөрү катышты.
Тегерек столдун жүрүшүндө катышуучулар өз банктарындагы практикалык тажрыйбалары менен бөлүшүп, инженердик системаларды эксплуатациялоодо колдонулган заманбап ыкмаларды жана техникалык чечимдерди талкуулашты. Ошондой эле инженердик инфраструктураны эксплуатациялоону жана техникалык тейлөөнү өркүндөтүү боюнча пикир алмашуу болду.
Улуттук банктын маалыматына ылайык, эл аралык тегерек стол кесиптик өз ара аракеттенүүнү бекемдөөгө жана инженердик системаларды эксплуатациялоо жана техникалык тейлөө багытында мындан аркы кызматташтыктын келечектүү багыттарын аныктоого мүмкүнчүлүк берди.
