Улуттук банктын өкүлү Ислам кызматташтык уюмунун борбордук банктарынын жыйынына катышты
КРнын Улуттук банкынын төрагасынын орун басары Азат Козубеков Ислам кызматташтык уюмунун борбордук банктарынын 8-жыйынына катышты.
Жыйын 13–14-сентябрда Түркиянын Стамбул шаарында Ислам кызматташтык уюмунун Экономикалык жана соода кызматташтыгы боюнча туруктуу комитетинин “OIC-COMCEC Central Banks Forum” алкагында өткөн борбордук банктардын 8-жыйынына катышты.
Улуттук банктын басма сөз кызматынын маалыматына таянсак, иш-чарада азыркы экономикалык шарттардагы акча-кредит саясаты жана эл аралык резервдерди башкаруу стратегиясы талкууланды.
Козубеков «Геосаясий таасирлер жана макроэкономикалык туруктуулук: дүйнөлүк экономиканын фрагментациялануу шарттарында ИКУга мүчө өлкөлөрдүн борбордук банктарынын акча-кредит саясаты боюнча чаралары» аттуу сессияда сөз сүйлөдү.
Анын жүрүшүндө ал Кыргызстандын Улуттук банкынын инфляцияга түрткү берүүчү тышкы тобокелдиктердин таасирин азайтууга жана улуттук валютанын сатып алуу жөндөмдүүлүгүн сактоого багытталган акча-кредит саясаты боюнча тажрыйбасы менен бөлүштү.
