Ак-Сууда мамлекеттик кызматкерлерге финансылык сабаттуулук боюнча лекция өтүлдү
Улуттук банктын Ысык-Көл областтык башкармалыгы Ак-Суу районунда мамлекеттик мекемелердин жана айыл өкмөттөрүнүн кызматкерлери үчүн финансылык сабаттуулукту жогорулатууга багытталган көчмө лекция өткөрдү. Бул тууралуу аталган мекемеден билдиришти.
Иш-чара 15-сентябрда Улуттук банктын региондордо финансылык сабаттуулукту жогорулатуу боюнча 2026-жылга бекитилген планынын алкагында уюштурулду.
Лекциянын жүрүшүндө катышуучуларга акча каражаттарын туура башкаруу, үнөмдөөнүн маанилүүлүгү жана топтолгон каражаттарды сактоо жана көбөйтүү жолдору тууралуу маалымат берилди. Ошондой эле жеке финансыларды пландаштыруу боюнча түшүндүрмөлөр айтылды.
Мындан тышкары, жарандардын кредит алууга өзүнө-өзү тыюу салуу мүмкүнчүлүгү, дропперлик жана финансылык алдамчылыктын түрлөрү тууралуу маалыматтар берилди. Адистер мындай коркунучтардан сактануу үчүн финансылык операцияларда этият болуунун маанилүүлүгүнө көңүл бурушту.
