Садыр Жапаров коррупцияны азайта албаганын мойнуна алды
“Мен өлкөгө жетекчи болуп келгенден бери коррупция менен күрөшүүнү башкы милдет кылгам, бирок коррупциянын тамыры кеңири жайылып, коомду бул илдеттен толук арылтуу азырынча мүмкүн болбой жатканын моюнга алышыбыз керек”. Бул тууралуу бүгүн, 25-ноябрда, өтүп жаткан биринчи элдик курултайда президент Садыр Жапаров билдирди.
«Коррупция азайбай жатат. Бул илдет эки баштуу ажыдаарга айланды: бир башын кесип салсак, экинчиси дароо өсүп чыгып жатат», – деп наалыды президент.
Жапаров коррупция менен күрөш уланып жатканын, жеңилип берүү болбойт экенин айтты.
«Эгерде элибиз ал менин тууганым же жердешим деп коррупционерлерди коргой берсе, анда бул оорудан эч качан арыла албайбыз. Баарыбыз, ар бирибиз мамлекеттин, элдин мүлкүн уурдаган коррупционерлерди колдобой, “Коррупционерсиңби? Анда мыйзам алдында жооп бересиң”, – деп сынга алсак, ошондо гана коррупцияны чогуу жеңебиз», – деп ал сөзүн улантты.
