Президент: МИКтин уставдык капиталы 87,5 млрд сомго жетти
Мамлекеттик ипотекалык компания (МИК) тарабынан салынып жаткан турак жайлардын баасы базардагы баадан кыйла төмөн. Бул тууралуу Президент Садыр Жапаров “Кабар” агенттигине берген маегинде билдирди.
Президенттин айтымында, МИК аркылуу берилген батирлер 25 жылга, алгачкы төлөмсүз сунушталат. Бишкек шаарында мамлекеттик турак жай программасынын алкагында 1 чарчы метрдин баасы жайгашкан районуна жараша 900–1 000 АКШ долларын түзөт.
МИКтин “Социалдык ипотека” (жалгыз бой энелер, мүмкүнчүлүгү чектелген жарандар жана алардын камкорчулары) жана “Жеңилдетилген ипотека” (мугалимдер, дарыгерлер жана бюджеттик кызматкерлер) багыттары боюнча батирлер жылдык 4% менен, 25 жылга, алгачкы төлөмсүз берилет. Ал эми “Арзан ипотека” багыты боюнча пайыздык чен жылына 8% түзөт.
Мындан тышкары, “Үлүштүк курулуш” механизми аркылуу батирлердин 1 чарчы метринин баасы 1 000–1 400 долларды түзөт. Бул программа негизинен чет өлкөлөрдө иштеп жүргөн мигранттарга багытталган. Анда жарандар батирдин наркынын 50%ын дароо төлөп, калган бөлүгүн 15 жылга чейин бөлүп төлөшөт.
Президент базардагы бааларга салыштырмалуу МИКтин сунушу кыйла жеткиликтүү экенин белгиледи. Анын айтымында, Бишкекте жаңы курулуп жаткан батирлердин 1 чарчы метри 2 000–3 000 долларга чейин жетет жана көбүнчө ремонту жок абалда сунушталат. Ал эми МИКтин объектилери толук бүткөрүлгөн (“под ключ”) форматта берилет.
2025-жылдын жыйынтыгы менен 4 662 үй-бүлө турак жайга ээ болду. Салыштырмалуу алганда, 2024-жылы бул көрсөткүч 1 197 үй-бүлөнү түзгөн.
Учурда республика боюнча жалпы 80 245 батир курулуп жатат. Алардын жалпы аянты 5,4 млн чарчы метрди түзөт. 2026-жылы 20 021 батирди пайдаланууга берүү пландалууда. Анын ичинде Бишкек шаарында — 6 323, Чүй облусунда — 3 129, Манас шаарында — 3 219 батир курулат.
Садыр Жапаровдун айтымында, МИК батирлерди өздүк наркынан бир аз жогору баада сатууга аргасыз. Себеби компания масштабдуу курулуштарды улантып, узак мөөнөттүү программаларды ишке ашырышы керек.
“Эгер батирлерди өздүк наркында эле берсек, компания 25 жылдык мөөнөт, инфляция жана минималдуу кирешени эске алганда банкрот болуп калмак”, — деди президент.
Ошол эле учурда мамлекет мигранттар үчүн өзүнчө кезек түзүү жана мүмкүнчүлүгү чектелген жарандарга кошумча жеңилдиктерди берүү мүмкүнчүлүгүн карап чыгаарын билдирди.
