Садыр Жапаров Чанпэн Чжаону Ысык-Көлдүн туристтик мүмкүнчүлүктөрү менен тааныштырды
Президент Садыр Жапаров кечээ, 7-февралда, Ысык-Көл облусуна болгон иш сапарынын алкагында Binance ири эл аралык криптобиржасынын негиздөөчүсү Чанпэн Чжао менен жолугуп, аймактын туристтик потенциалын тааныштырды.
Жолугушуунун жүрүшүндө тараптар “Каракол” тоо лыжа базасынын инфраструктурасы менен таанышып, анын өнүгүү келечегин биргелешип карап чыгышты. Мамлекет башчысы Ысык-Көл облусунда тоо лыжа кластерлерин өнүктүрүү эл аралык туризмди тартуудагы стратегиялык артыкчылык экенин белгиледи. Ошондой эле учурда “Ала-Тоо Резорт” тоо лыжа кластеринин курулушу уланып жатканын маалымдады.
Садыр Жапаров менен Чанпэн Чжао комплекс жайгашкан аймактын тоолордун кооз панорамасы көрүнгөн эң бийик чекиттеринин бирине чыгышты. Binance компаниясынын негиздөөчүсү калың карды, жаратылыш шарттарын жана тейлөө деңгээлин жогору баалап, Ысык-Көлдөгү курорттордун алдыңкы европалык тоо лыжа борборлору менен атаандашууга толук мүмкүнчүлүгү бар экенин белгиледи.
Жолугушуу чай ичүү менен аяктап, анда тараптар инфраструктуралык долбоорлор жана аймакты өнүктүрүү маселелерин бейформал шартта талкуулоону улантышты.
