Адылбек Касымалиев Дүйнөлүк банктын вице-президенти менен жолукту
Министрлер Кабинетинин Төрагасы Адылбек Касымалиев Вашингтондо Дүйнөлүк банктын Европа жана Борбор Азия боюнча вице-президенти Антонелла Бассани менен жолукту. Жолугушуу ЭВФ жана Дүйнөлүк банк тобунун жазгы жыйындарынын алкагында өттү. Бул тууралуу Өкмөттүн басма сөз кызматынан билдиришти.
Касымалиев акыркы төрт жылда ИДПнын орточо өсүшү 10,2% түзгөнүн, 2025-жылы 11,1%га жетиши күтүлүп жатканын билдирди. ЭВФтин маалыматына ылайык, Кыргызстан 2024-жылы өсүш темпи боюнча дүйнөдөгү алдыңкы үч өлкөнүн катарына кирген.
Өсүш өнөр жай, курулуш жана кызмат көрсөтүү тармактары, ошондой эле Камбар-Ата ГЭС-1 жана Кытай–Кыргызстан–Өзбекстан темир жолу сыяктуу ири долбоорлор менен шартталууда.
Социалдык реформаларга да көңүл бурулуп, 2025-жылы кабыл алынган жаңы Эмгек кодекси аялдардын экономикалык мүмкүнчүлүктөрүн кеңейтти.
2025-жылы өндүрүш көлөмү 30,1%га өсүп, айрыкча тамак-аш кайра иштетүү тармагында жакшы көрсөткүчтөргө жетишилди. Кыргызстан Дүйнөлүк банктын “AgriConnect” демилгесине кошулууга кызыкдар экенин билдирди.
Антонелла Бассани жүргүзүлүп жаткан реформаларды жогору баалап, мындан ары да колдоо көрсөтүүгө даяр экенин айтты.
Жыйынтыгында “REMIT” долбоору боюнча макулдашууга жана 2026-2028-жылдарга каржылоо алкагына кол коюлду.
