Садыр Жапаров Кара-Кулжадагы ири курулуш долбоорлору менен таанышты
Президент Садыр Жапаров 14-апрелде Ош облусуна болгон иш сапарынын алкагында Кара-Кулжа районундагы борбордук стадиондун жана “Тынчтык”, “Буранов” парктарынын реконструкциялоо долбоорлору менен таанышты. Бул тууралуу Президенттин басма сөз кызматынан билдиришти.
Курулуш, архитектура жана турак жай-коммуналдык чарба министри Нурдан Орунтаев иштер республикалык бюджеттин эсебинен жүргүзүлүп жатканын билдирди.
Маалыматка ылайык, аянты 25 гектар болгон “Тынчтык” паркында капиталдык оңдоо иштери жүрүп жатат. Долбоордун алкагында аймакты көрктөндүрүү, жарыктандыруу, сугат системасын орнотуу, веложолдорду жана балдар аянтчаларын куруу иштери каралган.
Ошондой эле район тургундары үчүн негизги эс алуу жайы болгон “Буранов” паркы да жаңыланууда. Бул жерде инженердик системалар жаңыртылып, сахналык аянтча, активдүү эс алуу зоналары жана балдар аянтчалары түзүлөт.
Белгиленгендей, эки парктагы иштерди 2026-жылы аяктоо пландалууда.
Мындан тышкары, Президентке борбордук стадионду реконструкциялоо долбоору сунушталды. Объекттин жалпы аянты 21 миң чарчы метрден ашык болуп, долбоордун наркы 168 млн сомду түзөт. Курулуш иштерин 2027-жылы бүтүрүү мерчемделүүдө.
Жыйынтыгында Садыр Жапаров долбоорлорду сапаттуу жана өз убагында ишке ашыруунун маанилүүлүгүн белгилеп, тиешелүү органдарга иштерди туруктуу көзөмөлдөөнү тапшырды.
