ЖК комитети тышкы саясат жана миграция боюнча мыйзам долбоорлорун жактырды
Жогорку Кеңештин Эл аралык иштер, коргоо, коопсуздук жана миграция боюнча комитетинин жыйынында бир катар мыйзам долбоорлору каралып, колдоо тапты. Бул тууралуу ЖКнын Басма сөз кызматынан билдиришти.
Атап айтканда, "Мамлекеттик органдардын Кыргыз Республикасынын тышкы саясат чөйрөсүндөгү өз ара аракеттенүүсү жөнүндө" мыйзамды күчүн жоготту деп таануу тууралуу мыйзам долбоору экинчи окууда жактырылды. Демилгечи – Министрлер Кабинетинин Төрагасы.
Тышкы иштер министринин орун басары Кайрат Турсункулов белгилегендей, мыйзам долбоору тышкы саясат маселелеринде мамлекеттик органдардын өз ара аракеттенүүсүн Президенттин Жарлыгы менен жөнгө салууга багытталган.
Жыйындын жүрүшүндө депутат Чолпон Эсенаманова бул багыттагы практикалык иштерге байланыштуу суроолорду көтөрдү.
Ошондой эле комитетте "Тышкы миграция жөнүндө" мыйзамга өзгөртүүлөрдү киргизүү тууралуу мыйзам долбоору үчүнчү окууда каралып, колдоо тапты. Документ 16 жашка чыга элек жарандарга жалпы жарандык паспорт берүү тартибин жөнөкөйлөтүүнү көздөйт.
