Кыргызстан менен Дүйнөлүк банк биргелешкен “жол картасын” иштеп чыгуу маселесин талкуулады
Министрлер Кабинетинин Төрагасы Адылбек Касымалиев Дүйнөлүк банктын Европа жана Борбор Азия аймагы боюнча аймактык директору Абебе Адугнай менен жолугушту. Жолугушуу Эл аралык валюта фонду жана Дүйнөлүк банк тобунун жазгы жыйындарынын алкагында өттү. Бул тууралуу Өкмөттүн Басма сөз кызматынан билдиришти.
Анда өлкөдөгү экономикалык абал, макроэкономикалык туруктуулук жана жүргүзүлүп жаткан реформалар талкууланды. Касымалиев теңдештирилген фискалдык жана акча-кредит саясаты инвесторлордун ишенимин арттырып жатканын белгиледи.
Ошондой эле улуттук өнүктүрүү программасынын артыкчылыктары, “жашыл экономикага” өтүү, климаттын өзгөрүүсүнө ыңгайлашуу жана гендердик теңчилик маселелери көтөрүлдү. Адамдык капиталды өнүктүрүү, билим берүү жана саламаттыкты сактоо тармактарын модернизациялоо маанилүү экени айтылды.
Мындан тышкары, Кыргызстан “АгриКоннект” демилгесине катышууга кызыкдар экенин билдирди.
Өз кезегинде Дүйнөлүк банктын өкүлү өлкөнүн экономикалык өсүш темпин жогору баалап, жүргүзүлүп жаткан реформаларды белгиледи. Ал келечектеги долбоорлор боюнча биргелешкен “жол картасын” иштеп чыгуу зарылдыгын айтты.
Жыйынтыгында тараптар кызматташууну мындан ары да чыңдоого даяр экенин билдиришти.
