Садыр Жапаров Ноокатта элдин көйгөйлөрүн укту
Президент Садыр Жапаров бүгүн Ош облусунун Ноокат районунда жергиликтүү актив жана тургундар менен түз жолугушуу өткөрдү. Бул тууралуу Президенттин Администрациясы билдирди.
Жолугушууда тургундар таза ичүүчү суу, жолдордун абалы, мектеп жана бала бакча куруу, жер тилкелерин каттоо жана мүлктүк талаштарды чечүү маселелерин көтөрүштү. Ошондой эле жарандардын укуктарын коргоо, курулуш компанияларынын иши, соттук процесстер жана укук коргоо органдарынын ишине байланышкан суроолор талкууланды.
Мындан тышкары, социалдык жактан аялуу жарандарды колдоо, турак жай менен камсыз кылуу жана этникалык кыргыздарды документтештирүү жол-жоболорун жөнөкөйлөтүү боюнча сунуштар айтылды. Билим берүү тармагын өнүктүрүү, педагогдордун эмгегин баалоо жана маданий демилгелерди ишке ашыруу маселелери да көтөрүлдү.
Президент эл менен түз диалогдун маанилүүлүгүн белгилеп, айтылган бардык маселелер өз убагында жана системалуу түрдө чечилиши керектигин билдирди.
Ошондой эле Садыр Жапаров 10-майдан тарта бардык айыл өкмөттөрүндө ушундай жолугушуулар өткөрүлөрүн айтты. Бул иш жарандардын кайрылууларына жеринде ыкчам жооп берүү максатын көздөйт.
Жыйынтыгында мамлекет башчысы тиешелүү органдарга көтөрүлгөн маселелерди ар тараптуу карап чыгып, зарыл чараларды көрүү боюнча тапшырмаларды берди.
