Адылбек Касымалиев Америка мамлекеттеринин уюмунун Башкы катчысы менен жолукту
Вашингтонго болгон жумуш сапарынын алкагында Министрлер Кабинетинин Төрагасы Адылбек Касымалиев Америка мамлекеттеринин уюмунун Башкы катчысы Альберт Рамдин менен жолугушту. Бул тууралуу Өкмөттүн Басма сөз кызматынан билдиришти.
Жолугушуу уюмдун штаб-квартирасында өтүп, анда тараптар Кыргызстандын Америка континентиндеги өлкөлөр менен байланышын чыңдоо маселелерин талкуулашты.
Сүйлөшүүлөрдүн жүрүшүндө Адылбек Касымалиев өлкөнүн социалдык-экономикалык өнүгүүсү тууралуу маалымат берип, акыркы үч жылда Кыргызстанда туруктуу өсүш байкалганын белгиледи.
“ИДПнын орточо жылдык өсүү темпи кеминде 9%ды түздү, ал эми 2025-жылдын жыйынтыгы боюнча 11,5%га жетти. Бул жүргүзүлүп жаткан реформалардын жыйынтыгы”, — деди ал.
Ошондой эле жолугушууда Кыргызстандын Америка мамлекеттеринин уюмунда туруктуу байкоочу статусун алуу мүмкүнчүлүгү каралды. Бул кадам саясий диалогду кеңейтүүгө, тажрыйба алмашууга жана экономикалык кызматташууну өнүктүрүүгө өбөлгө түзөрү белгиленди.
Мындан тышкары, кыргыз тарап уюмга мүчө өлкөлөрдү 2026-жылдын 31-августунан 6-сентябрына чейин Кыргызстанда өтө турган VI Дүйнөлүк көчмөндөр оюндарына катышууга чакырды.
Өз кезегинде Альберт Рамдин кыргыз делегациясын жылуу кабыл алып, Кыргызстандын экономикалык өсүш көрсөткүчтөрүн жогору баалап, кызматташууну өнүктүрүүгө колдоо көрсөтөрүн билдирди.
Жыйынтыгында тараптар көтөрүлгөн демилгелерди ишке ашырууга кызыкдар экенин белгилешти.
