Кыргызстан Meta менен санариптик кызматташууну күчөтөт
АКШга болгон жумуш сапарынын алкагында Министрлер Кабинетинин Төрагасы Адылбек Касымалиев Meta Platforms компаниясынын мамлекеттик саясат боюнча директору Молли Монтгомери менен жолугушту. Бул тууралуу Өкмөттун Басма сөз кызматынан билдиришти.
Жолугушуунун алдында кыргыз делегациясы Metaнын Вашингтондогу технологиялык борбору менен таанышып, компаниянын инновациялык ишмердүүлүгү тууралуу маалымат алды. Анда жасалма интеллектке негизделген технологиялар, кийилүүчү электроника жана кеңейтилген реалдуулук (AR) багытындагы акыркы иштелмелер көрсөтүлдү.
Сүйлөшүүлөрдүн жүрүшүндө тараптар санариптик трансформация, маалымат коопсуздугу жана институттук кызматташууну өнүктүрүү маселелерин талкуулашты. Адылбек Касымалиев Кыргызстан үчүн коопсуз санариптик чөйрөнү түзүү жана эл аралык тажрыйбаны киргизүү маанилүү экенин белгиледи.
Ошондой эле ал Meta компаниясы менен туруктуу жана натыйжалуу кызматташуу механизмин түзүүгө кызыкдар экенин билдирип, түз байланыш каналдарын түзүүнүн зарылдыгын белгиледи.
Өз кезегинде Молли Монтгомери Кыргызстандын санариптик өнүгүүдөгү жетишкендиктерин жогору баалап, кызматташууну тереңдетүүгө даяр экенин билдирди. Ал Meta компаниясы өлкөдөгү колдонуучулар үчүн коопсуз санариптик чөйрөнү камсыздоого кызыкдар экенин белгиледи.
Жолугушуунун жыйынтыгында тараптар биргелешкен жумушчу топ түзүү боюнча макулдашууга жетишти. Аталган топ мындан аркы кызматташуунун жол картасын иштеп чыгып, маалымат коопсуздугу жана санариптик долбоорлорду ишке ашыруу багытында иш алып барат.
