Парижде кыргыз-француз кызматташтыгын кеңейтүү маселеси талкууланды
Париж шаарындагы жумуш сапарынын алкагында Министрлер Кабинетинин төрагасынын биринчи орун басары Данияр Амангелдиев Франциянын сенаторлору жана бизнес өкүлдөрү менен жолугушту. Бул тууралуу Өкмөттүн Басма сөз кызматынан билдиришти.
Жолугушуу “Франция — Борбор Азия” достук тобунун сенаторлору менен өткөрүлүп, анда эки өлкөнүн кызматташтыгынын учурдагы абалы жана келечеги талкууланды. Тараптар парламенттер аралык байланыштарды жана парламенттик дипломатияны өнүктүрүүнүн маанилүүлүгүн белгилешти.
Ошондой эле кыргыз тарап саясий диалогду бекемдөө жана эки тараптуу кызматташууну алдыга жылдырууда парламенттердин, комитеттердин жана депутаттык достук топторунун ортосундагы өз ара аракеттенүүнү активдештирүү зарылдыгын баса белгиледи.
Франциянын бизнес өкүлдөрү менен болгон жолугушууга AIRBUS, VEOLIA, LAZARD Frères жана башка ири компаниялар катышты. Тараптар кыргыз-француз экономикалык кызматташтыгын кеңейтүү жана биргелешкен долбоорлорду ишке ашыруу мүмкүнчүлүктөрүн талкуулашты.
Жолугушууда жашыл энергетика, авиация, фармацевтика жана ири долбоорлорду каржылоо тармактары кызматташуу үчүн эң келечектүү багыттар катары белгиленди.
Жыйынтыгында тараптар кыргыз-француз өнөктөштүгүн мындан ары да чыңдоого жана сүйлөшүүлөрдү практикалык долбоорлорго айландырууга даяр экенин ырасташты.
