Президент согуш ардагерлерине 200 миң сомдон жардам берүү тууралуу тескемеге кол койду
Президент Садыр Жапаров Улуу Ата Мекендик согуштун ардагерлерине бир жолку материалдык жардам көрсөтүү тууралуу тескемеге кол койду.
Документке ылайык, согуш ардагерлеринин айрым категорияларына 200 миң сом өлчөмүндө бир жолку жардам берилет. Бул максатта Кыргыз Республикасынын Президентинин фондунан жалпысынан 4 млн 848 миң сом бөлүнөт.
Каражат Эмгек, социалдык камсыздоо жана миграция министрлиги аркылуу, почта чыгымдарын эске алуу менен төлөнөт.
Бир жолку жардам төмөнкү категориядагы жарандарга берилет:
- Улуу Ата Мекендик согуштун катышуучуларына;
- Экинчи дүйнөлүк согуш учурунда нацисттер түзгөн концлагерлерде, геттолордо жана башка кармоо жайларында жашы жете элек туткун болгон адамдарга;
- Ленинград блокадасы маалында (1941-жылдын 8-сентябрынан 1944-жылдын 27-январына чейин) шаардагы ишканаларда, мекемелерде иштеп, тиешелүү медалдар жана белгилер менен сыйланган жарандарга.
Бул чечим согуш ардагерлерине мамлекеттик колдоо көрсөтүүнүн алкагында кабыл алынган.
