Садыр Жапаров TRON негиздөөчүсү Жастин Сан менен жолугушту
Күн мурун Президент Садыр Жапаров TRON блокчейн-платформасынын негиздөөчүсү Жастин Санды кабыл алды. Жолугушууда Кыргызстанда виртуалдык активдерди жана блокчейн технологияларын өнүктүрүү маселелери талкууланды.
Мамлекет башчысы TRON платформасынын криптоиндустриядагы ролун белгилеп, санариптик доордо мындай технологиялар жаңы мүмкүнчүлүктөрдү ачып жатканын айтты. Ал Кыргызстанда бул тармакты өнүктүрүүгө өзгөчө көңүл бурулуп жатканын кошумчалады.
Президенттин айтымында, өлкөдө Виртуалдык активдер жана блокчейн технологияларын өнүктүрүү боюнча Улуттук кеңеш түзүлүп, бир катар маанилүү чечимдер кабыл алынган. Алардын катарында улуттук стейблкоинди ишке киргизүү жана санариптик валютаны сыноо демилгелери бар.
Ошондой эле мыйзамдык база жаңыланып, жакын арада тармакты жөнгө салуучу жаңы мамлекеттик орган түзүлөрү белгиленди. Кыргызстан криптовалютаны кабыл алуу боюнча дүйнөдө алдыңкы орундардын бирин ээлейт.
Жастин Сан өз кезегинде Кыргызстанда бул тармакты өнүктүрүү үчүн чоң мүмкүнчүлүктөр бар экенин айтып, кызматташууга кызыкдар экенин билдирди. Ал TRON экосистемасын тааныштырып, өлкөдө ишмердүүлүк жүргүзүү жана билим берүү долбоорлорун ишке ашыруу пландары бар экенин айтты.
Жыйынтыгында Президент тиешелүү органдарга блокчейн жана виртуалдык активдер тармагында кызматташууну күчөтүү боюнча тапшырма берди.
