Кадамжайда садака кутусун бузган жигит кармалды
Кадамжайда мечиттеги садака үчүн коюлган кутудан акча уурдаган деп шектелген жаш жигит кармалганын Баткен облусунун Ички иштер башкармалыгынын басма сөз кызматы билдирди.
Маалыматка ылайык, 20-апрелде саат болжол менен 3:30да Ички иштер министрлигинин Коомдук коопсуздук кызматынын ыкчам башкаруу борборунун инспектору түштүк аймак боюнча санариптик көзөмөл жүргүзүп жатып, белгисиз адам "Аль-Бухари" мечитинин аймагында садака кутусун бузуп, акчаны алып кеткенин байкаган. Бул маалымат дароо укук коргоо органдарына берилген.
Окуя болгон жерге Кадамжай райондук ички иштер бөлүмүнүн тергөө-ыкчам тобу чыккан. Ыкчам аракеттердин натыйжасында шектүү аныкталып, кармалган — ал Ош облусунун Ноокат районуна караштуу Бел-Өрүк айылынын 19 жаштагы тургуну Ж.И. болуп чыккан.
Бул факт Кылмыштардын бирдиктүү реестрине Кыргыз Республикасынын Кылмыш-жаза кодексинин 205-беренеси ("Уурулук") боюнча катталган. Учурда тергөө иштери жүрүп жатат.
