Бишкекте абадагы интернет-кабелдерди демонтаждоо башталды
Бишкекте Биринчи май райондук акимиатынын кызматкерлери "Бишкексвет" муниципалдык ишканасы менен биргеликте талаптарга жооп бербеген интернет-кабелдерди аныктоо боюнча рейд өткөрүшкөнүн бүгүн райондук администрация билдирди.
Текшерүүлөрдүн жүрүшүндө салбырап турган линияларга, жолдун жана тротуарлардын үстүнөн өткөн кабелдерге, ошондой эле шаардын көркүн бузган тармактарга өзгөчө көңүл бурулду.
Эрежелерди бузуу менен орнотулган жана буга чейин тургундардан даттануулар түшкөн кабелдер демонтаждалат. Провайдерлерге тармактарды талаптарга ылайык келтирүү жана аба аркылуу өткөн линияларды жер алдындагы коммуникацияларга өткөрүү боюнча эскертүүлөр жөнөтүлдү.
Бул чаралар шаардык инфраструктураны комплекстүү жаңылоо алкагында жүргүзүлүүдө. Анын ичинде эски троллейбус мамыларын демонтаждоо жана борборду Шанхай кызматташтык уюму саммитине, ошондой эле Дүйнөлүк көчмөндөр оюндарына даярдоо иштери бар. Ошол эле учурда кабелдерди жер алдындагы тармактарга өткөрүү иши уланууда.
