Кыргызстан менен Монголиянын кызматташтыгы жаңы баскычка көтөрүлүүдө
Министрлер Кабинетинин Төрагасы Адылбек Касымалиев Монголиянын Кыргызстандагы Атайын жана Ыйгарым укуктуу Элчиси Содном Ганхуягды анын дипломатиялык миссиясынын аякташына байланыштуу кабыл алды. Бул тууралуу Өкмөттүн Басма сөз кызматынан билдиришти.
Жолугушуунун жүрүшүндө акыркы жылдары эки өлкөнүн ортосундагы достук жана кызматташтык мамилелердин активдүү өнүгүп жатканы белгиленди. Айрыкча мамлекет башчыларынын өз ара мамлекеттик сапарлары маанилүү окуяларга айланып, эки тараптуу байланыштарды чыңдоого өбөлгө түзгөнү айтылды.
Мындан тышкары, Монголиянын Премьер-министринин Кыргызстанга расмий сапары, ошондой эле соода-экономикалык, илимий-техникалык жана маданий-гуманитардык кызматташтык боюнча кыргыз-монгол өкмөттөр аралык комиссиясынын жыйындары эки өлкө ортосундагы кызматташуунун кеңейишине шарт түздү.
Тараптар учурда бир катар тармактардагы долбоорлорду илгерилетүү боюнча иштер жүрүп жатканын белгилешип, соода-экономикалык жана маданий-гуманитардык байланыштар туруктуу өнүгүп жатканын баса белгилешти.
Адылбек Касымалиев үстүбүздөгү жылдын сентябрь айында Кыргызстанда өтө турган VI Дүйнөлүк көчмөндөр оюндарына токтолуп, Монголиянын делегациясы салттуу түрдө активдүү катышып, иш-чарага өзгөчө көрк кошоруна ишеним билдирди.
Өз кезегинде Элчи Содном Ганхуяг монгол тарап эки өлкө ортосундагы мамилелерди мындан ары да чыңдоого жана өнүктүрүүгө, ошондой эле биргелешкен долбоорлорду ишке ашырууга даяр экенин белгиледи.
