Садыр Жапаров Астанада өтүп жаткан Регионалдык экологиялык саммитке катышууда
Президент Садыр Жапаров бүгүн Казакстандын Астана шаарында өтүп жаткан Регионалдык экологиялык саммитке катышуу үчүн барды.
“EXPO” Эл аралык көргөзмө борборунда мамлекет башчысын Казакстан Республикасынын Президенти Касым-Жомарт Токаев тосуп алды.
Расмий тосуп алуу аземинен жана биргелешкен сүрөткө түшүүдөн кийин мамлекет жана өкмөт башчылары Жашыл жана туруктуу технологиялардын эл аралык көргөзмөсү менен таанышышты. Иш-чарага Кыргызстандын, Казакстандын, Грузиянын, Түркмөнстандын, Монголиянын, Өзбекстандын, Тажикстандын лидерлери жана Азербайжандын премьер-министри катышты.
Көргөзмөдө ар бир өлкө өзүнүн улуттук павильонун сунуштады. Кыргызстандын павильонунда күн панелдери, жер семирткичтер, электромобилдер үчүн кубаттоочу түзмөктөр жана башка ата мекендик продукциялар көрсөтүлдү.
Андан соң делегация башчылары Регионалдык экологиялык саммиттин пленардык жыйынына катышуу үчүн Конгресс-борборго өтүштү.
Белгилей кетсек, саммит туруктуу өнүгүү боюнча жалпы көз карашты калыптандырууга жана Борбор Азия өлкөлөрүнүн экологиялык саясатын Бириккен Улуттар Уюму менен өнөктөштүктө координациялоого багытталган. Иш-чаранын алкагында пленардык жыйындар, тематикалык эксперттик панелдер жана жашыл технологиялардын эл аралык көргөзмөсү өткөрүлүүдө.
