Кыргызстанда эң кымбат окутуу келишими 288 миң сом

Кыргызстанда жогорку окуу жайларындагы эң кымбат окутуу келишиминин баасы 288 миң сомго жеткенин депутат Медер Чотонов бүгүн Жогорку Кеңештин жыйынында билдирди. Анда "Баатыр эне" ордени менен сыйланган энелердин балдарына мамлекеттик билим берүү жеңилдиктерин берүү тууралуу токтом долбоору талкууланды.

Анын айтымында, Агартуу министрлигинин маалыматы боюнча, ЖОЖдордогу эң арзан контракттын баасы 29,5 миң сом болсо, эң кымбаты — 288 миң сомду түзөт.

"Айрым жогорку окуу жайларда окуу акысы доллар менен төлөнөт. Андай жерлерде окуунун баасы 7,5 миң долларга чейин жетет. Бул, өзгөчө көп балалуу үй-бүлөлөр үчүн абдан жогорку сумма", — деди Медер Чотонов.

Ал баатыр энелерди жана алардын балдарын колдоого багытталган бул токтомду колдоого чакырды.

Бул үй-бүлөлөрдү, айрыкча алардын балдарын колдоо максатында, аталган категориядагы студенттер үчүн ЖОЖдордо контракттык окуу акысына 50 пайыздык жеңилдик берүү сунушталууда. Бул жеңилдик окуу жайдын менчигинин түрүнө же кайсы мекемеге караштуу экенине карабастан колдонулат.

Жеңилдик биринчи жогорку билимди алууда гана берилет.