Максат Алымбековго мандат тапшырылды
Борбордук шайлоо комиссиясы 19-майдагы отурумунда Максат Алымбековго мандат берди.
Ага №20 көп мандаттуу шайлоо округу боюнча Жогорку Кеӊештин депутатынын бош мандаты өткөрүлүп берилди.
11-майда Темирлан Айтиев өз арызы менен депутаттык мандатын тапшырган.
Максат Алымбеков парламенттик шайлоодо 2867 добуш алган.
Ал Ысык-Көл облусунун Балыкчы шаарында төрөлгөн. 2001-жылы Бишкек шаарындагы орто мектепти аяктап, Жусуп Баласагын атындагы Кыргыз улуттук университетинен “Юриспруденция” адистигин аяктаган.
Б.Ельцин атындагы Кыргыз-орус славян университетинен “Каржылык менеджмент” багыты боюнча экинчи жогорку билимин алган.
Эмгек жолун 2005-жылы жеке адвокаттык кеңседе адвокаттын жардамчысы катары баштап, 2008-жылга чейин иштеген.
2017–2021-жылдары Бишкек шаардык кеңешинин аппаратынын жетекчиси болгон.
2021-жылы Бишкек шаардык кеңешинин депутаты – “Ынтымак” фракциясынын лидери болуп иштеп жаткан.
