Кыргызстан Европа өлкөлөрү менен укуктук байланышты бекемдейт
Кыргыз Республикасы кылмыш иштери боюнча өз ара укуктук жардам көрсөтүү жөнүндө Европа конвенциясына кошулуу боюнча расмий чакыруу алды. Бул тууралуу Башкы прокуратурадан билдиришти.
Бул чечим Кыргызстан менен Европа өлкөлөрүнүн ортосунда кылмыш-жаза сот өндүрүшү, эл аралык укуктук жардам көрсөтүү жана трансулуттук кылмыштуулукка каршы күрөшүү жаатындагы кызматташтыкты чыңдоодогу маанилүү кадам катары бааланууда.
Маалыматка ылайык, Конвенцияга кошулуу эл аралык кылмыш иштерин иликтөөдө кызматташуунун натыйжалуулугун жогорулатууга, чет мамлекеттерден далилдерди алуу жана кылмыштуу активдерди издөө мүмкүнчүлүктөрүн кеңейтүүгө шарт түзөт.
Ошондой эле бул кадам Европа конвенциясына катышкан мамлекеттер менен кылмыштуулукка каршы күрөшүү жана эл аралык коопсуздукту камсыз кылуу багытындагы өз ара аракеттенүүнү күчөтүүгө мүмкүндүк берет.
Учурда Страсбург шаарында өтүп жаткан Европа Кеңешинин эксперттер комитетинин 89-пленардык жыйынынын алкагында Кыргыз Республикасынын Башкы прокуратурасынын өкүлү соттолгон адамдарды өткөрүп берүү маселелери боюнча практикалык колдонмо жана сунуштамаларды иштеп чыгуучу жумушчу топтун курамына кирди.
Белгиленгендей, бул чечимдер Кыргызстандын эл аралык кылмыш-укуктук кызматташуудагы ролунун өсүп жатканын көрсөтүп, мыйзамдуулукту жана коопсуздукту камсыз кылуу багытындагы эл аралык өнөктөштүктү кеңейтүүгө өбөлгө түзөт.
