Садыр Жапаров Швейцариянын Улуттук банкынын төрагасын кабыл алды

Президент Садыр Жапаров кечээ Чолпон-Ата шаарында Швейцариянын Улуттук банкынын төрагасы Мартин Шлегелди кабыл алды.

Жолугушууда эки өлкөнүн борбордук банктарынын ортосундагы кызматташтыкты өнүктүрүү, техникалык өз ара аракеттенүү жана тажрыйба алмашуу маселелери талкууланды. Ошондой эле финансылык-банктык тармакка эл аралык стандарттарды киргизүүгө көңүл бурулду.

Мамлекет башчысы Улуттук банктын дараметин чыңдоо жана адистердин квалификациясын жогорулатуу Кыргызстан үчүн маанилүү багыт экенин белгиледи. Ал Швейцариянын бул тармактагы тажрыйбасы өлкө үчүн чоң мааниге ээ экенин айтып, кызматташтыкты мындан ары да улантууга кызыкдар экенин билдирди.

Тараптар эл аралык резервдерди башкаруу боюнча кызматташууга өзгөчө көңүл бурушту. Садыр Жапаров кыргыз тарап кесиптик тажрыйба алмашууну кеңейтүүгө жана адистер ортосунда туруктуу диалогду колдоого даяр экенин айтты.

Өз кезегинде Мартин Шлегель Кыргызстанга болгон биринчи сапарына кубанычта экенин белгилеп, эки өлкөнүн борбордук банктарынын кызматташтыгын жогору баалады. Ал 1990-жылдары Швейцариянын Улуттук банкынын эксперттери сомду киргизүү боюнча кеңеш беришкенин эске салып, бүгүнкү күндө сом аймактагы эң күчтүү валюталардын бири экенин айтты.

Мындан тышкары, ал Швейцария кыргыз тарап менен техникалык өнөктөштүктү улантууга даяр экенин билдирип, Кыргызстандын экономикалык өсүү темпи Борбор Азиядагы эң жогорку көрсөткүчтөрдүн бири экенин белгиледи.

Жолугушуунун соңунда Мартин Шлегель Ысык-Көлдүн жаратылышына жана Кыргызстандын кооз тоолуу пейзаждарына жогору баа берди.