Жаштар мамлекеттик башкаруунун жаңы мууну болууга даярдалууда
Кыргызстанда мамлекеттик башкаруунун жаңы муунун калыптандырууга багытталган "Жаш кадрлар мектеби" долбоорунун катышуучулары менен Министрлер Кабинетинин Төрагасынын орун басары Улан Маматканов жолугушту. Бул тууралуу Өкмөттөн билдиришти.
Маалыматка ылайык, жолугушууда өлкөнүн өнүгүүсүндөгү жаштардын орду, мамлекеттик кызматка кесипкөй кадрларды тартуу жана келечектеги лидерлерди даярдоо маселелери талкууланды.
Улан Маматканов бүгүнкү күндө Кыргызстан масштабдуу өзгөрүүлөрдүн жана динамикалуу өнүгүүнүн доорун баштан кечирип жатканын белгиледи.
"Акыркы жылдары өлкө тездик менен өзгөрүп, өнүгүүнүн жаңы баскычына өтүүдө. Ири долбоорлор ишке ашырылып, жаңы Кыргызстанды куруу процесси жүрүп жатат", — деди ал.
МинКаб Төрагасынын орун басары белгилегендей, мамлекет башчысы жаш жана кесипкөй адистерди мамлекеттик башкаруу системасына тартууга өзгөчө көңүл буруп келет. Анын айтымында, мамлекеттик институттардын өз ара тыгыз жана координацияланган иши гана өлкөнүн туруктуу өнүгүүсүн камсыздай алат.
Жолугушуунун жүрүшүндө жаштардын потенциалын өнүктүрүү, санариптик технологияларды жайылтуу жана өлкөнүн таланттуу кадрлар резервин даярдоо маселелери дагы көтөрүлдү.
Ошондой эле Улан Маматканов Кыргыз Республикасын 2030-жылга чейин өнүктүрүүнүн Улуттук программасынын максаттарына токтолуп, бул максаттарга жетүүдө жаштардын салымы чоң болорун белгиледи.
Жыйынтыгында ал "Бир депутат – бир окуучу" долбоорунун маанисине токтолуп, катышуучуларга билим алууда жана кесиптик өнүгүү жолунда ийгиликтерди каалады.
