Президентке Ош шаарынын өнүктүрүү долбоорлору тааныштырылды
Президент Садыр Жапаров бүгүн Ош облусуна болгон кыска мөөнөттүү иш сапарынын алкагында Ош шаарын өнүктүрүүгө багытталган бир катар ири инфраструктуралык жана инвестициялык долбоорлор менен таанышты.
Мамлекет башчысына шаар чөйрөсүн модернизациялоого, калктын жашоо шартын жакшыртууга жана инвестициялык жагымдуулукту арттырууга багытталган пландар сунушталды.
Долбоорлордун арасында аянты 22 миң чарчы метрден ашкан жана 5200 көрүүчүгө ылайыкталган көп функционалдуу спорттук аренанын курулушу каралган. Бул объект жаштар үчүн спорттук мелдештерди, маданий жана коомдук иш-чараларды өткөрүүгө мүмкүнчүлүк түзөт.
Мындан тышкары, Ош шаарында туристтерди жана кол өнөрчүлөрдү колдоого багытталган этно-тарыхый комплекс куруу пландалууда. Комплекстин аймагында эс алуу паркы, тарыхый-маданий зоналар жана соода аянтчалары жайгашат.
Ошондой эле эл аралык франшизалардын негизинде иштей турган мейманканаларды жана билим берүү мекемелеринин филиалдарын куруу долбоорлору сунушталды.
Ош шаарынын мэри Жанарбек Акаев белгилегендей, бул долбоорлор шаардын архитектуралык көрүнүшүн жаңылап, анын инвестициялык жана туристтик потенциалын жогорулатууга өбөлгө түзөт.
Сунушталган долбоорлор менен таанышкандан кийин Президент Садыр Жапаров бардык курулуш жана инвестициялык демилгелерди ишке ашырууда сапатка өзгөчө көңүл бурууну, ошондой эле тартылган каражаттарды натыйжалуу пайдаланууну тапшырды.
