Экономика министрлиги Россия менен стратегиялык пландаштыруу боюнча Меморандумга кол койду
Россия Федерациясынын Президенти Владимир Путиндин Кыргыз Республикасына болгон мамлекеттик визитинин алкагында Кыргыз Республикасынын Экономика жана коммерция министрлиги менен Россия Федерациясынын Экономикалык өнүгүү министрлиги стратегиялык пландаштыруу тармагында кызматташтык боюнча Меморандумга кол коюшту.
Экономика министрлигинин маалыматына ылайык, документ эки тараптуу тажрыйба алмашууну тереңдетүү, долбоордук башкаруу, социалдык-экономикалык өнүгүүнү пландаштыруу жана мониторинг жүргүзүү максатында түзүлгөн.
Меморандум төмөнкү багыттарды камтыйт:
- стратегиялык пландаштыруу боюнча аналитикалык материалдар жана мыкты тажрыйбаларды алмашуу;
- биргелешкен билим берүү программаларын, стажировкаларды жана эксперттик иш-чараларды өткөрүү;
- улуттук долбоорлорду жана мамлекеттик программаларды иштеп чыгуу жана жүзөгө ашыруу;
- мамлекеттик программалардын эффективдүүлүгүн баалоо боюнча консультациялык колдоо;
- мамлекеттик башкаруу маселелери боюнча изилдөөлөр жана конференцияларды өткөрүү;
- эки өлкөнүн адистери үчүн окуу-методикалык материалдарды даярдоо.
Меморандум кол коюлган күндөн тартып күчүнө кирди, беш жылдык мөөнөткө эсептелип, андан ары узартылышы мүмкүн. Бул документ мамлекеттик органдардын институционалдык потенциалын бекемдөөгө, стратегиялык пландаштыруу ыкмаларын жакындатууга жана кадрларды өнүктүрүүгө мүмкүндүк берет.
