В.Путин: Россиядан Кыргызстанга 2 млрд долларга жакын инвестиция тартылды
Россия президенти Владимир Путин Бишкектеги эки тараптуу жолугушууда Кыргызстан экономикасына салынган россиялык инвестициянын көлөмү 2 млрд долларга жакын болгонун билдирди.
Россия лидери өткөн жылдын жыйынтыгы боюнча эки өлкө ортосундагы товар жүгүртүү 13,6%га жетип, 4,1 млрд долларды түзгөнүн баса белгиледи. Ошондой эле ал быйылкы жылдын январь-сентябрь айларында бул көрсөткүч 17%га өскөнүнө токтолду.
В.Путин финансылык өз ара кызматташуудагы негизги өзгөрүү башка валюталардан толук баш тартуу болгонун билдирип, өлкөлөр арасындагы бардык төлөмдөрдүн 97%ы улуттук валюталар менен жүргүзүлүп жатканын кошумчалады.
Россия лидери Кыргызстанда россиялык катышуу менен 1700 ишкана иштеп жатканын билдирди. “Россиялык инвесторлордун Кыргызстан менен болгон кызматташтыктагы мындай ишеними сиздин аракетиңиз жана ички саясаттагы жакшы динамикага байланыштуу. Биз сиздин башкарууңуз алдында республика туруктуу өлкө, ишенимдүү өнөктөш болгонун ыраазычылык менен айтып келе жатабыз”, - деди В.Путин.
Сүйлөшүүлөр учурунда кызматташуунун перспективдүү багыттары баса белгиленди. Жаратылыш газы менен мунай продукцияларын салттуу жеткирүүдөн сырткары россиялык компаниялар жогорку технологиялык долбоорлорду карап жатышканы айтылды.
Алар:
• тынч атомду өнүктүрүү;
• күн, шамал электр станцияларын куруу;
• санариптик экономика тармагындагы долбоорлор;
• транспорттук-логистикалык маршруттарды кеңейтүү.
Коопсуздук жаатында В.Путин Бирдиктүү россиялык аскер базасынын ролун өзгөчө белгилеп, аны региондун туруктуулугун камсыз кылууда негизги фактор катары атады.
