Францияда массалык иш таштоолордон улам алкоголдук компаниялар ишин токтотушту
Франциядагы массалык иш таштоолордон улам 26 алкоголдук ичимдик өндүрүүчү компания өз ишин токтотууга аргасыз болгонун "Казинформ" агенттиги кабарлады.
Иш таштоолор шарап, шампан, коньяк жана башка спирт ичимдиктерин өндүргөн ири компанияларга терс таасирин тийгизген. LCI телеканалы билдиргендей, Франциянын түндүк-чыгышындагы Шампан-Арден аймагында жайгашкан Ruinart жана Moët & Chandon компанияларынын кызматкерлеринин 80%ы иш таштоого чыгышкан.
Алар ишкана жетекчилигинин жылдык бонус төлөмүн жокко чыгаруу чечимине каршы экенин билдиришкен. Бул бонус 1967-жылдан бери төлөнүп келген жана быйыл алгачкы жолу токтотулуп жатат. Профсоюз өкүлдөрү билдиргендей, бул бонустун жоктугу айрым кызматкерлер үчүн эмгек акынын 10-15% төмөндөшүнө алып келет.
2024-жылдын биринчи чейрегинде алкоголдук ичимдиктерге болгон суроо-талап 33%га төмөндөгөн, жыл аягына чейин бул көрсөткүч 36%га жетиши мүмкүн. Бул, негизинен Кытайдын француз коньягын импорттоого чектөө киргизиши жана АКШда керектөөнүн азайышы менен байланыштуу.
