ЕАЭБде курулуш кызматтарынын бирдиктүү рыногу кеңейтилди
21-декабрда Санкт-Петербург шаарында өткөн Жогорку Евразия экономикалык кеңешинин жыйынында курулуш тармагындагы кызмат көрсөтүүлөрдүн бирдиктүү рыногун (ККБР) андан ары өнүктүрүүгө багытталган чечимдер кабыл алынды.
Экономика министрлигинен билдиргендей, жыйында курулуш долбоорлорун башкаруу жаатындагы 14 секторду камтыган жана башкы подряддык жана башкы долбоордук иштерди ККБР принциптерине этап-этабы менен өткөрүүнү караган төрт либералдаштыруу планы бекитилди.
Жол карталарынын ишке ашуусу ККБР режимин өнөр жай, коммерциялык, айыл чарба жана турак жай курулуштарына, ошондой эле автомобиль жолдорун, темир жолдорду, энергетикалык жана инфраструктуралык объектилерди курууга жайылтууга мүмкүндүк берет. Бул ЕАЭБ мамлекеттериндеги курулуш компаниялары үчүн кошумча юридикалык жактарды түзүүгө зарылчылыкты жоюп, каттоодон өткөн өлкөдө алынган уруксат берүүчү жана квалификациялык документтер Союздун бардык аймагында өз ара таанылат.
Бул чечим ЕАЭБ өлкөлөрүндө курулуш кызмат көрсөтүүлөрүн интеграциялоо жана рынокту либералдаштыруу процессин мындан ары күчөтөт.
