Кыргызстан менен Азербайжан экономикалык кызматташтыкты өнүктүрүүнү талкуулады

Кечээ экономика жана коммерция министринин орун басары Медер Туманов Азербайжандын Борбор Азия өлкөлөрү боюнча соода өкүлү Самед Гасанов менен жолугушту.

Ведомствонун маалыматына ылайык, жолугушуунун жүрүшүндө 8-декабрда Бакуда өткөн Кыргызстан менен Азербайжандын ортосундагы экономикалык жана гуманитардык кызматташтык боюнча Өкмөттөр аралык комиссиянын 6-жыйынынын жыйынтыктары талкууланды.

Сүйлөшүүлөрдүн жыйынтыгында тараптар эки тараптуу кызматташтыкты мындан ары өнүктүрүүнүн кийинки кадамдарын аныкташты. Атап айтканда, товар жүгүртүүнү көбөйтүү, өнөр жай кооперациясын кеңейтүү жана Азербайжан-Кыргызстан өнүктүрүү фондунун ишмердүүлүгүн активдештирүү маселелери каралды.