Дүйнөдөгү эң бай 500 адамдын байлыгы 2,2 трлн долларга жетти
2025-жылы дүйнөдөгү эң бай 500 адамдын байлыгы рекорддук деңгээлде — 2,2 триллион долларга өстү. Бул тууралуу Bloomberg агенттиги маалымдады.
Маалыматка ылайык, Bloomberg байлык индексинде катталган жалпы өсүштүн болжол менен төрттөн бири болгону сегиз адамга туура келген. Алардын арасында Oracle компаниясынын директорлор кеңешинин төрагасы Ларри Эллисон, Tesla компаниясынын башкы директору Илон Маск, Alphabet компаниясынын негиздөөчүлөрүнүн бири Ларри Пейдж жана Amazon компаниясынын негиздөөчүсү Джефф Безос бар.
Миллиардерлердин жалпы байлыгы 11,9 триллион долларга жетти. 2025-жылы капиталдын эң чоң өсүшү АКШ менен Канадага туура келип, бул көрсөткүч 1,1 триллион долларды түздү.
Агенттиктин маалыматына караганда, капиталдын өсүшү 2024-жылдын аягында АКШ президенттик шайлоосунда Дональд Трамптын жеңиши менен "олуттуу түрдө тездеген".
