Samsung смартфондорунун баасы кымбатташы мүмкүн
Samsung корпорациясы комплекттөөчү бөлүктөр рыногундагы татаал абалга байланыштуу смартфондордун баасы жогорулашы мүмкүн экенин билдиргенин GSMArena маалымдады.
Мобилдик бөлүмдүн кош башкы директору Тиэм Ронун (TM Roh) айтымында, тармак акыркы жылдардагы "баа жагынан эң кыйын кырдаалдардын бирине" туш болду. Бул түзмөктөрдүн наркын кайра карап чыгууга алып келиши мүмкүн. Ошол эле учурда компания Apple менен атаандаштыкта позициясын жоготпоо үчүн жаңы флагмандык Galaxy S26 сериясына айрым аймактарда бааларды өзгөртпөй кармоо мүмкүнчүлүгүн да карап жатат.
Белгилей кетсек, Apple 2025-жылы кайрадан дүйнөдөгү эң ири смартфон өндүрүүчү макамын кайтарып алган.
Маалымат сактоо тутумунун жана башка компоненттердин баасынын өсүшү, негизинен жасалма интеллекттин (ЖИ) тез өнүгүшү менен шартталып, смартфондорго гана эмес, телевизорлорго жана башка "акылдуу" техникага да таасирин тийгизди. Samsung компаниясынын глобалдык маркетинг бөлүмүнүн башчысы Вонджин Ли (Wonjin Lee) фирма жаңы экономикалык реалдуулукка ылайык "бааларды кайра карап чыгуу" мүмкүнчүлүгүн изилдеп жатканын ырастады.
Samsung 2026-жылы жасалма интеллект функцияларын колдогон 400 миллион жаңы түзмөктү, анын ичинде смартфондорду, телевизорлорду жана тиричилик техникаларын чыгарууну пландап жатат.
