"Мамлекеттик Финансылык Холдинг" Чаткалдагы ГЭС каскадын курууга 61 млн доларга кепилдик берди
"Мамлекеттик финансылык холдинги"ААКы "Грант Холдинг" ЖЧКсынын "Элдик Банк" ААКсынын алдындагы кредиттик милдеттенмелерине 60 млн 950 миң доллар сумммада кепилдик бергени мамлекеттик холдингдин Кыргызстандын фондулук биржасындагы отчетунда камтылганын "economist.kg" сайты жарыялады.
Бул ири макулдашуу 2025-жылдын 25-декабрында үч тараптуу кепилдик келишими алкагында жүргүзүлгөн. Мамлекеттик колдоонун берилишине — МинКабдын 2025-жылдын 19-декабрындагы №1126-р токмому негиз болгон. Милдеттенмелердин көлөмү операция жүргүзүлгөн учурда холдингдин активдеринен 10% ашкан.
Алынган каражаттар Жалал-Абад облусунда мамлекеттик-жеке өнөктөштүк долбоорун ишке ашырууга багытталат. Долбоор Чаткал дарыясындагы Чаткал чакан гидроэлектростанциялары каскадын куруу, иштетүү жана тейлөө боюнча жүргүзүлөт (Каныш-Кыян айылдык аймагы).
Долбоордун жалпы кубаттуулугу — 145,89 МВт. Каскадга төмөнкү төрт станция кирет:
- "Башкы-Терек";
- "Коргон-Сай";
- "Чуңкурчак";
- "Айгыр-Джал".
