Дүйнө миллиардерлеринин жалпы байлыгы 18,3 трлн долларга жетти
Дүйнө жүзүндөгү эң бай адамдардын жалпы байлыгы 2025-жылы акыркы беш жылдагы орточо көрсөткүчкө салыштырмалуу үч эсе ылдам көбөйгөнүн жана планета калкынын дээрлик жарымы жакырчылыкта жашап жатканын Reuters агенттиги жарыялаган.
Oxfam уюмунун изилдөөсүндө 2025-жылы дүйнөдөгү миллиардерлердин жалпы байлыгы 18,3 трлн долларга жеткени айтылат (2,5 трлн долларга же 16%га өскөн). Ал эми 2020-жылдан берки инфляцияны эске алганда 8,2 трлн долларга (81%) көбөйгөн. Ал эми 2,5 трлн доллар сумма дүйнөдөгү эң жакыр 4,1 млрд адамдын жалпы байлыгына барабар.
Oxfam укук коргоо уюму байлыктын жаңы өсүү толкуну, анын ичинде АКШнын президенти Дональд Трамптын трансулуттук корпорацияларды колдогон саясаты жана жасалма интеллект менен алектенген компаниялардын баасынын кымбатташы, экономикалык жана саясий ажырымды тереңдетип, демократиянын туруктуулугуна коркунуч туудуруп жатканын эскертти.
Байлар менен калктын калган бөлүгүнүн ортосундагы айырманын өсүшү саясий таасирдин бир колго топтолушуна алып келүүдө. Отчетто айтылгандай, бүгүнкү күндө миллиардерлер кадимки жарандарга салыштырмалуу 4 миң эсе көп саясий кызматтарды ээлешет. Мындан тышкары, дүйнөдөгү эң ири медиа компаниялардын жарымынан көбү дал ушул миллиардерлерге таандык.
