Өзбекстан Беларустан ижарага жер алып иштетип, бул өлкөгө айыл чарба продукцияларын экспорттойт
Өзбекстан мал чарба тармагындагы бир нече долбоорду ишке ашыруу максатында Беларустан айдоо аянттарын узак мөөнөткө ижарага алууну көздөп жатканын "Дунё" кабар агенттиги жазды.
Мындай сүйлөшүү Кашкадарыя облусунун делегациясы Беларуска барганда болгон. Сапардын алкагында өзбекстандык өкүлдөр Витебск облусунун бир катар райондорунда, анын ичинде Браслав, Шумилин жана Поставы аймактарында мал чарба комплекстеринин жана соода объекттеринин ишмердүүлүгү менен таанышышты.
Иш сапардын эң маанилүү практикалык жыйынтыгы — "Asl Yuksalish Savdo", "Muborak qorako‘lchilik" ишканалары жана Шумилин районунда жайгашкан "Сиротинский" мал чарба фермасынын ортосунда макулдашууга жетишилгени болду.
Макулдашууга ылайык, өзбек тарап узак мөөнөткө 4 миң гектар айдоо жерин ижарага алат. Бул жерде ири агрардык долбоор ишке ашырылып, анын биринчи этабында 1000 баш ири мүйүздүү мал өстүрүлөт.
Мындан тышкары, "Asl Yuksalish Savdo" ишканасы Доброном соода түйүнү менен келишим түзүп, Өзбекстандан Беларуска жыл сайын 60 миң тонна айыл чарба продукциясын жеткирүүнү макулдашты. Экспортко кургатылган мөмөлөр, буурчак өсүмдүктөрү, ошондой эле бакча-жемиштер жана жүзүм кирет.
