Былтыр Ош облусунда 12 энергообъект пайдаланууга берилген

Энергетика министрлигинин тапшырмасынын негизинде, 2025-жылы “КУЭТ” ААКнын каржылоосу менен Ош электр тармактары ишканасында капиталдык курулуш планы аткарылды. Анын алкагында 7 объект жаңыдан курулуп, 5 объект капиталдык ремонттон өткөрүлүп, пайдаланууга берилди. Бул тууралуу Энергетика министрлигинен билдиришти.

Жаңы курулуштардын ичинде Өзгөн районунун Куршаб айыл аймагындагы Куршаб УЭСи, Салам-Алик УЭСи, Кара-Суу РЭТинин Отуз-Адыр УЭСи, ошондой эле 220/110/10 кВ “Узловая” жана 35/10 кВ “Ой-Тал” көмөк чордондорунда кызматтык имараттар салынды. Алай РЭТинин Сары-Таш бөлүмүндө да алгач ирет кызматтык имараттын курулушу башталды.

Мындан тышкары, Өзгөн жана Кара-Суу РЭТтеринин имараттары толук капиталдык ремонттон өткөрүлүп, айланасы асфальтталды. Ош электр тармактарынын Электр энергиясын сатуу мекемесинин имараты, Кара-Кулжа РЭТиндеги жана Өзгөн РЭТине караштуу Жазы УЭСиндеги объектилер да жаңыланып, кызматкерлер үчүн шарттар жакшыртылды. Араван РЭТинин алыскы Пахтачы УЭСинде капиталдык ремонт иштери аткарылды.

Бул иштер энергетиктердин эмгек шарттарын жакшыртууга жана электр тармактарынын ишенимдүүлүгүн жогорулатууга багытталган.