Чаткалда ГЭСтер каскадын куруу долбоору башталды
Бүгүн, Чаткал районунун Каныш-Кыя айылында Чаткал районундагы ГЭСтер каскадын куруу иштерине старт берилди. Бул тууралуу президенттин Жалал-Абад облусундагы ыйгарым укуктуу өкүлчүлүгүнөн билдиршти.
Маалымака ылайык, иш-чарага президенттин Жалал-Абад облусундагы ыйгарым укуктуу өкүлү Тилек Текебаев, Чаткал ГЭС каскад долбоорунун илимий жетекчиси Акылбек Жапаров, Чаткал районунун акими Алтынбек Сенирбаев, Кытайдын “SINOMACH” компаниясынын өкүлдөрү жана жергиликтүү тургундар катышты.
Анын алкагында, эки ири энергетикалык долбоордун курулушу да башталды. Тактап айтканда, Каныш-Кыя айыл аймагынын “Кара-Корум” тилкесинде кубаттуулугу 5 МВт болгон муниципалдык чакан ГЭСтин, ошондой эле Жаңы-Базар айылында кубаттуулугу 1 МВт болгон муниципалдык күн электр станциясынын курулушуна старт берилди.
Чакан ГЭС жылына орточо 20 млн кВт/саатка жакын электр энергиясын өндүрүүгө жөндөмдүү болсо, күн электр станциясы жылына 1,6 млн кВт/саат электр энергиясын иштеп чыгарат. Бул көрсөткүчтөр аймактагы электр энергиясына болгон тартыштыкты азайтып, импортко болгон көз карандылыкты төмөндөтүүгө өбөлгө түзөт.
Долбоорлорду ишке ашыруу үчүн жалпысынан 8 миллион долларга жакын инвестиция тартылат. Каржылоо булактары катары мамлекеттик колдоо, муниципалдык ресурстар жана жеке инвесторлордун каражаттары каралган.
Курулуш иштери аяктагандан кийин 100дөн ашык жаңы жумуш орундары түзүлөт.Чаткал районундагы ГЭСтер каскадын куруу долбоору мамлекеттик-жеке өнөктөштүк алкагында ишке ашырылып, ага 259,8 миллион доллар өлчөмүндө инвестиция тартылат. Мындан тышкары, миң гектардан ашык жер аянттары сугат суу менен камсыз болот.
