Избаскент көмөк чордонунда 50 жылдык эски жабдуулар алмаштырылды
Энергетика министрлигинин калкты сапаттуу жана үзгүлтүксүз электр энергиясы менен камсыз кылуу, алдыдагы 2026-2027-жылдардагы күз-кыш мезгилине карата даярдык көрүү, эскирген жабдууларды жаңылоо боюнча койгон милдеттерин ишке ашыруунун алкагында Жалал-Абадда Избаскент 110/35/6 кВ көмөк чордонунда ири жаңылоо иштери жүргүзүлдү. Бул тууралуу аталган министрликтин басма сөз кызматы билдирди.
Маалыматка караганда, Избаскент 110/35/6 кВ көмөк чордонунан Ноокен районундагы Момбеков айыл аймагындагы 3625 абонент жана Кочкор-Ата шаарындагы 3000ден ашуун керектөөчү электр энергиясы менен камсыздалат.
Жаңылоонун негизги себеби: 50 жылдан ашуун убакыт кызмат кылган эски жабдуу бүгүнкү күндө техникалык жактан эскирип, электр энергиясын бөлүштүрүүдө бир топ кыйынчылыктарды жаратып келген. Өзгөчө аба ырайынын өзгөрүшүнө туруштук бере албай, үзгүлтүктөр көп катталып, жабдууну тез-тез оңдоп-түзөөгө туура келчү.
Жаңы система компьютердик башкаруу мүмкүнчүлүгүнө ээ. Анын жардамы менен чыңалуу кайсы жерде үзгүлтүккө учураганын ыкчам аныктап, авариялык кырдаалды кыска убакытта калыбына келтирүүгө шарт түзүлдү.
