Электр тармактарын санариптештирүү боюнча талкуу өттү
Бишкек шаарында “Кыргызстан улуттук электр тармагы” ААКнын жетекчилигинин жана Корея эл аралык кызматташтык агенттигинин (KOICA) эксперттеринин катышуусунда семинар болуп өттү. Бул тууралуу Энергетика министрлигинен билдиришти.
Маалыматка караганда, иш-чара Корея Республикасы тарабынан каржыланган “Заманбап башкаруу тутумдарын (SCADA/DMS) ишке киргизүү аркылуу Кыргызстандын электр тармактарынын туруктуулугун жогорулатуу” пилоттук долбоорунун алкагында уюштурулду. Долбоор 2025–2027-жылдарга эсептелген жана анын жалпы бюджети 2,5 млрд вонду түзөт.
Долбоордун негизги максаты – “Кыргызстан улуттук электр тармагы” ААКтын базасында заманбап бөлүштүрүүнү башкаруу борборун түзүү. Бул борбор жогорку технологиялык SCADA/DMS программалык камсыздоосу менен жабдылып, төмөнкүдөй мүмкүнчүлүктөрдү берет:
Электр тармактарын реалдуу убакыт режиминде аралыктан көзөмөлдөө жана башкаруу;
Мүчүлүштүктөрдү тез арада аныктоо жана электр энергиясын берүүнүн ишенимдүүлүгүн жогорулатуу;
Бөлүштүрүлгөн энергия булактарын тутумга интеграциялоо.
Семинардын жүрүшүндө “Кыргызстан улуттук электр тармагы” ААКтын адистерин окутуу маселесине өзгөчө көңүл бурулду. 2026-жылдын июль айында ишкананын 7 адиси (инженерлер, диспетчерлер жана РЗА адистери) Түштүк Кореяга 10 күндүк стажировкага жөнөп кетишет. Бул окутуу кыргызстандык адистерге жаңы тутумду сырткы эксперттердин жардамысыз, өз алдынча иштетүүгө жана келечекте долбоорду масштабдаштырууга жол ачат.
