Кыргызстанда электр энергиясынын тартыштыгы 3,5 миллиард киловатт-саатты түзөт
Кыргызстанда учурда электр энергиясынын тартыштыгы болжол менен 3,5 миллиард киловатт-саатты түзөт. Бул тууралуу министрлер кабинетинин төрагасынын биринчи орун басары Данияр Амангелдиев "Биринчи радионун" эфиринде билдирди.
Анын айтымында, өлкөдө жыл сайын жаңы гидроэлектр станциялары курулуп, кошумча кубаттуулуктар ишке берилгенине карабастан, электр энергиясын керектөө тынымсыз өсүп жаткандыктан тартыштык сакталууда. Ошондой эле жыл сайын 100 жаңы ишкана ачылып жаткандыктан, электр тармактарына болгон жүк дагы көбөйүүдө — натыйжада электр энергиясына болгон муктаждык өсүүдө.
Министрлер Кабинетинин Төрагасынын биринчи орун басарынын пикиринде, экономикалык өсүштүн темпин камсыз кылуу үчүн биринчи кезекте энергетика тармагына өзгөчө көңүл буруу зарыл. Энергетика тармагы мамлекеттин артыкчылыктуу багыттарынын бири бойдон калууда.
Данияр Амангелдиев жакынкы мезгилде жалпы кубаттуулугу болжол менен 1 миллион киловатт болгон жаңы электр станциялары пайдаланууга берилерин эске салды.
Мындан тышкары, күн жана шамал энергетикасын өнүктүрүү дагы артыкчылыктуу багыт бойдон каларын кошумчалады.
