Тамга–Пржевальск аба чубалгысында реконструкция иштери башталды
Ысык-Көл облусундагы негизги электр берүүчү линиялардын бири болгон 110 кВ Тамга–Пржевальск аба чубалгысын реконструкциялоо иштери башталды. Бул тууралуу Ысык-Көл электр тармагы ишканасынан билдиришти.
Маалыматка ылайык, долбоор үч этап менен ишке ашырылат. Биринчи этапта Покровка–Барскоон тилкесиндеги 40,3 чакырым аба чубалгысы жаңыланып, курулуш-монтаждоо иштери 70 күндүн ичинде аяктайт.
Экинчи этапта Барскоон–Тамга тилкесиндеги 6,2 чакырым линия реконструкцияланып, иштер 2026-жылдын октябрь айында башталат. Ал эми үчүнчү этап — Покровка–Каракол тилкесиндеги 34,5 чакырым линияны жаңылоо 2027-жылга пландалган.
Белгиленгендей, аталган электр чубалгысы 1967-жылы курулуп, бүгүнкү күнгө чейин пайдаланылып келген. Ал Каракол шаарын, ошондой эле Жети-Өгүз, Түп жана Ак-Суу райондорун электр энергиясы менен камсыздайт.
Акыркы жылдары калктын санынын өсүшү жана жаңы өндүрүш объектилеринин курулушу электр энергиясына болгон суроо-талапты көбөйткөн. Айрыкча кыш мезгилинде линияга күч келип, айрым учурларда убактылуу чектөөлөрдү киргизүүгө туура келген.
Маалыматка ылайык, реконструкция аяктагандан кийин аймактар туруктуу жана сапаттуу электр энергиясы менен камсыз болот.
Ошондой эле реконструкция иштеринин жүрүшүндө айрым аймактарда чыңалуунун убактылуу өзгөрүшү мүмкүн экени эскертилди.
