Бишкекте онго жакын көмөк чордондун кубаттуулугу жогорулатылууда
Энергетика министрлиги энергетика тармагын өнүктүрүүгө багытталган реформаларды ишке ашырып, энергетикалык инфраструктураны жаңылоо жана электр менен камсыздоонун ишенимдүүлүгүн жогорулатуу боюнча бир катар долбоорлорду жүргүзүүдө. Бул тууралуу аталган министрликтин басма сөз кызматы билдирди.
Маалыматка ылайык, иш-чаралар электр энергиясына болгон тарифтик каражаттардын эсебинен каржыланып, эскирген энергетикалык объектилерди этап-этабы менен жаңылоого мүмкүнчүлүк түзүүдө.
35/110/220 кВ көмөк чордондорунда быйыл 215 даана электр жабдуусун капиталдык оңдоодон өткөрүү жана 3219 даана жабдууга техникалык тейлөө жүргүзүү пландалган. Бүгүнкү күнгө карата 581 даана жабдуу техникалык тейлөөдөн өткөрүлдү.
Аткарылып жаткан иштер көмөк чордондордун ишенимдүүлүгүн жогорулатып, технологиялык бузулуулар менен авариялык өчүрүүлөрдүн тобокелдигин азайтууга, электр энергиясынын сапатын жакшыртууга жана жабдуулардын иштөө мөөнөтүн узартууга өбөлгө түзөт.
Ошондой эле борбор калаадагы онго жакын көмөк чордондун кубаттуулугун жогорулатуу боюнча иштер жүргүзүлүүдө. Бул долбоорлорду ишке ашыруу электр энергиясына болгон өсүп жаткан суроо-талапты камсыздап, жаңы курулуштар үчүн кошумча кубаттуулук резервин түзүүгө мүмкүндүк берет.
